البوست الشامل عن كورسيرا

البوست #الشامل
ناس كتير سألتني عن #كورسيرا
فكتبت البوست ده كمحاولة مني للإجابة على الأسئلة التي سألها البعض والتي لم يسألها أحد!!


طيب.. نبدأ بسم الله, والصلاة والسلام على رسول الله وعلى آله وصحبه ومن والاه إلى يوم الدين, وبعد...


أكيد في أسئلة كتير عن الموضوع ده بتدور في دماغك... بإذن الله تعالى هحاول أجاوب على الأسئلة ديه قدر المُستطاع..


1- يعني ايه كورسيرا (Coursera) ؟!
موقع للكورسات الأون لاين في مختلف المجالات من جامعات عالمية مختلفة.


2- إزاي أدخل على كورسيرا؟ من خلال جوجل تكتب كورسيرا أو مباشرة من خلال اللينك ده:
http://www.coursera.org


3- إزاي أسجل؟
أولًا بتدخل تسجل حساب بالاسم والميل زي أي موقع أو منتدى ..عادي يعني مش حاجة صعبة..( وتقريبًا تقدر تسجل دخول من خلال حسابك على الفيس أو لينكدإن).


4- إزاي أبدأ؟
حاجة من اتنين: إما انت محدد كورسات معينة فهتدخل تدور على الكورسات ده.. هتلاقي محرك بحث خاص بالموقع هتكتب فيه الكورس اللي انت عاوزه..طب لو ملقتش..هتحاول تغير الكلمات المفتاحية لغاية ماتوصل للكورسات اللي انت عاوزها أو القريبة منها..
أو انك مش محدد حاجة مُعينة..فهتدخل تشوف الكورسات اللي الموقع بيقدمها وتختار منها اللي يناسبك ويناسب مجالك أو تخصصك.


5- وإيه نظام الكورسات؟
ممكن تختار الكورسات بطريقتين.. إما بصورة حرة ..يعني بتدخل تشوف كام كورس عاوزهم بتسجل فيهم..سواء كان ليهم علاقة ببعض أو لاء ..عادي..
أو بصورة Specialization وديه عبارة عن مجموعة كورسات مع بعض (لوكشة واحدة) طبعًا ليهم علاقة ببعض وبيكملوا بعض في الغالب.. إزاي يعني مش فاهم!!
يعني مثلًا أنا سجلت في Specialization مكونة من 5 كورسات (4 كورسات+ مشروع صغير كده بيعتبروه الكورس الخامس).. الكورسات ديه مرتبة 5,4,3,2,1 وكلها تحت مسمى واحد وبتكمل بعضها والأفضل انك تاخدهم بنفس ترتيبهم كده.. طب لو مش عاوز تاخدهم بنفس ترتيبهم؟ عادي بتاخدهم زي ما انت عاوز..بس الأفضل بالترتيب :)
طب ولو عاوز أسجل في ال Specialization ديه أعمل ايه؟
أولا بتعمل تسجيل في ال Specialization ككل.. وبعدين بتدخل على كورس كورس تسجل فيه على حده.. معنى كده إنك هتسجل كام مرة؟ 6 مرات .. تمام!!
وفي النهاية بتاخد تقريبًا 5 شهادات (لأني لسة مخلصتش فمش متأكدة من الجزئية ديه).. 4 شهادات للأربع كورسات وشهادة إنك خلصت ال Specialization كلها.. يعني مفيش شهادة للمشروع..
طيب ولو ما أخدتش المشروع أو منجحتش فيه؟ بتاخد 4 شهادات للأربع كورسات فقط لكن مبتاخدش شهادة انك خلصت ال Specialization كلها..


6- طيب خلاص حددت أنا عاوز أنهي كورسات, أسجل فيهم إزاي؟
ببساطة هتدوس تسجيل في الكورس.. بس ممكن تقابلك مشكلة.. إن الكورس ده بفلوس !! :o
أو الكورس مجاني,تقدر تسجل فيه وتجتازه كمان مجانًا, لكن متقدرش تاخد شهادة إلا بفلوس :D
طيب وأعمل إيه ساعتها؟ حضرتك هتقدم على حاجة اسمها financial aid أو الدعم المادي وديه بتاخد بيها الكورس والشهادة مجانًا بدون أي مقابل مادي :)
طب وديه بيدوها لأي حد كده عادي؟ تقريبًا آه.. بيدوها للي بيقدم عليها.. لما بتدوس على financial aid بيسألوك كام سؤال كده زي عاوز تاخد الكورس ده ليه؟ والشهادة مفيدة بالنسبالك في ايه؟ وليه مقدم على دعم مادي؟ (أكيد عشان مفلس ومش معاك فلوس للرفاهيات ديه :D )
وبالنسبة لل Specialization أقدم على دعم مادي إزاي؟
زي التسجيل بالظبط.. بتقدم على دعم مادي لكل كورس على حدة وبتملى البيانات لكل كورس على حدة (نفس البيانات :) )
طيب ولو قدمت على دعم لل Specialization ككل لكن مقدمتش للكورسات؟ يبقى مش هتاخد دعم للكورسات ديه وبالتالي مش هتاخد شهادة .. ركز لو سمحت :)


7- طيب أنا كده قدمت على الدعم, أعمل إيه بقى؟
بمجرد إنك قدمت على الدعم..كده الكورس بقى مفتوح قدامك,مبقاش عليك إلا إنك تبدأ تذاكر :)


8- وايه بقى نظام المحاضرات؟
الكورس بيبقى مدته مثلًا شهرين.. مقسم على 8 أسابيع.. كل أسبوع مثلًا فيه 4 محاضرات.. وكل محاضرة مدتها تقريبًا تتراوح مابين 10-25 دقيقة.
كده عندنا كام محاضرة؟ 4*8= 32 محاضرة تقريبًا.


9- طيب هل المحاضرات بتنزل كل أسبوع؟
في الغالب معظم المحاضرات بتنزل في أول أسبوع..والباقي بينزل تباعًا (ده لو مش نزلت كلها في أول أسبوع).. وده بيساعد الناس النشيطة اللي عندها همة (مش احنا طبعًا :D ) إنها لو خلصت أسبوع ممكن تدخل في الأسبوع اللي بعده وهكذا.. يعني ممكن حد يذاكر الكورس كله قبل ما مدته تنتهي (وده طبعًا مبيحصلش عندنا :D )
يعني باختصار, الماتريال كلها معاك تذاكر منها اللي انت عاوزه..
كل أسبوع بيبقى ليه الكويز (الامتحان) الخاص بيه.. كده يبقى عندنا كام كويز؟ 8 كويزات.. لاء غلط :) مش 8 .. انت نسيت ال midterm وال final .. كده عندنا 10 كويزات :D


10- إيه بقى طريقة المذاكرة والامتحان والتقييم والكلام ده؟
أنا عن نفسي مريت بطريقتين على كورسيرا:
الأولى كالآتي:
الكويزات: كل أسبوع بيبقى ليه Deadline (وقت مُحدد) لإجابة الكويز.. بس ال Deadline ده بيبقى قابل للتفاوض :) بحيث إنك لو محلتش الكويز خلال ال Deadline ده بيدوك فرصة عدد من الأيام (مثلًا 3 أيام) تحل خلالهم الكويز.. بعدها بيبقى في Hard Deadline وده بقى اللي مينفعش بعده تحل الكويز. لكن في حاجة مهمة.. كل يوم بعد ال Deadline الأولاني بيتخصم منك درجات على حسب الكورس بقى ..يعني لو كل يوم أخرته خصموا 10% يبقى هيتخصم منك 30% من درجة الكويز (يبقى مش هيتبقالك حاجة :D ).


الامتحان: ليك أكتر من محاولتين لحل نفس الامتحان بنفس الأسئلة.. وده بيديك فرصة أكبر للنجاح وبدرجات عالية كمان :)


طريقة التقييم: بتحل الكويزات كلها وبيتم احتساب الدرجات.. ولو جبت درجة النجاح بتنجح.. بمعنى انك لو في كويزات محلتهاش أو منجحتش فيها عادي..لأنك عندك 10 كويزات.. المهم المجموع النهائي..


أما التانية:
الكويزات: كل أسبوع بيبقى ليه Deadline برضه بس بسميه Deadline وهمي .. يعني بيتحط كده عشان تاخد بالك انك مسجل في كورس وتحاول تذاكر أول بأول.. لكن مش بتتحاسب عليه.. يعني ممكن لو مبدأتش مذاكرة كورس معين وخلاص فاضل أسبوع أو اتنين تقدر تلم نفسك وتذاكر وتحل الكويزات وتنجح في اسبوعين بس!!


الامتحان: ليك 3 محاولات لحل نفس الامتحان بنفس الأسئلة ..بس المفاجأة بقى ..ان كل 8 ساعات ليك 3 محاولات.. يعني في اليوم الواحد ليك 9 محاولات لحل الامتحان (هتنجح يعني هتنجح :D).. مفيش أسهل من كده :)


طريقة التقييم: هنا بقى التقييم مختلف.. كل كويز بيبقى ليه درجة نجاح.. بمعنى انك لازم تنجح في كل كويز على حدة عشان تقدر تنجح في الكورس ككل :D يعني مطلوب منك تنجح في 10 كويزات :)


وكده أبقى خلصت إجابة الأسئلة.. وللعلم الإجابة ديه مش ناقلاها من بوست ولا موقع..أنا عرفت الحاجات ديه كلها (بفضل الله) من خلال تفاعلي مع الموقع وتسجيلي في الكورسات وقابلت مشاكل وعقبات كتيرة عرفت من خلالها العقبات اللي ممكن تقابل اي حد وايه الحل ليها من خلال مراسلة الموقع او وضع مشكلتي أو استفساري على ال Discussion Board ..


آه صحيح افتكرت.. في حاجة اسمها Discussion Board وديه بتبقى عبارة عن صفحة بيتفاعل من خلالها الناس المسجلة في الكورس.. يعني هتلاقي علها أسئلة خاصة بالكورس أو الامتحان أو النتيجة أو الدرجات أو أي حاجة خاصة بالكورس.. بس نصيحة متكتفيش بقراءة ما كتبه الآخرون.. لازم انت كمان يكون ليك دور وتتفاعل مع المُحاضر والقائمين على الكورس والمسجلين معاك في الكورس.. لو في اي استفسار حطه وهما هيجاوبوا عليك.. وهذكر مثال بسيط كده ليا.. كنت مسجلة كورس على موقع EDX ومبعتوليش ميل ان الكورس ابتدى ولكن قدر الله اني دخلت اشوف الكورس ليه لسة مش بدأ لقيتهم في الاسبوع التاني وال Deadline وال Hard Deadline كمان عدوا خلاص !! رحت كتبت عن مشكلتي على ال Discussion Board والناس مشكورين فتحولي الكويز تاني وعديته!! فياريت تكون إيجابي وتشارك..


وفي نهاية البوست الطويل ده أسأل الله لي ولكم التوفيق.. وأسأله أن يرزقني وإياكم الصدق والإخلاص في القول والعمل..


وكالعادة.. ياريت تتابعوا الهاشتاجات الرائعة ديه:
#ملكش_حجة
#عافر_واتعلم
#العلم_لا_يكال_بالبتنجان
#هنساعد_تبدأ
#هتسبق_بخطوة
#شير_في_الخير


وأهم حاجة متنساش #الصلاة على الحبيب :)